თბილისის საქალაქო სასამართლოში, 7 ნოემბრის საქმეზე, საქართველოს მესამე პრეზიდენტის, მიხეილ სააკაშვილის სასამართლო პროცესი მიმდინარეობს. 

პენიტენციური სამსახურის გადაწყვეტილებით, პროცესს არ ესწრება თავად ექსპრეზიდენტი. 

პროცესის პარალელურად, სასამართლოს ეზოში, მიხეილ სააკაშვილის მხარდამჭერები არიან შეკრებილები და სკანდირებენ: "მიშა, მიშა", "ივანიშვილის მონებო". 

ისინი ყოფილი პრეზიდეტნის თავისუფლებას ითხოვენ. 

ადგილზე დიდი ოდენობით სამართალდამცავები არიან მობილიზებული. 

ცნობისთვის, სახელმწიფო ბრალდება მიხეილ სააკაშვილს 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.

საქართველოს ყოფილ პრეზიდენტს ბრალი საქართველოს სისხლის სამართლის კოდექსის 333-ე მუხლის მესამე ნაწილით აქვს წარდგენილი, რაც სამსახურებრივი უფლებამოსილების გადამეტებას გულისხმობს, რამაც ფიზიკური, ან იურიდიული პირის უფლების, საზოგადოების, ან სახელმწიფოს კანონიერი ინტერესის არსებითი დარღვევა გამოიწვია. აღნიშნული ბრალი სასჯელის სახედ და ზომად 5-დან 8 წლამდე ვადით თავისუფლების აღკვეთას ითვალისწინებს.